તને જોઇ જોઇ – રાજેન્દ્ર શાહ.

તને  જોઇ  જોઇ  તો  ય  તું  અજાણી,
જાણે  બીજને  ઝરૂખડે  ઝૂકી’તી  પૂર્ણિમા
                  ઝાઝેરો  ઘૂમટો  તાણી.

વ્યોમ  ને  વસુંઘરાની  કન્યા  કોડામણી,
તું  તો  છે  સંધ્યાની  શોભા  સોહામણી,
લોચને  ભરાય  તો  ય  દૂર  દૂર  ધામની;
વાયુની  લ્હેર  સમી  અંગને  અડી  છતાં  ય
                  બાહુને  બંધ  ના  સમાણી.

પોઢેલો  મૃગ  મારા  મનનો  મરુવને,
જલની  ઝંકોર  તારી  જગવી  ગૈ  એહને;
સીમ  સીમ  રમતી  તું,  ના’વતી  જરી  કને;
સાબરનાં  નીતરેલ  નીર  તું  ભલે  હો,  આજ
                  મારે  તો  ઝાંઝવાનાં  પાણી !