રામની અજબ રચના રે – કાગ.

રામની  અજબ  રચના  રે,   એનો  પાર  મનુષ્ય  કેમ  પાવે ?
પાર  મનુષ્ય  નહિ  પાવે  રે,  ભલે  ઊંચા વિમાન  ઉડાવે…..  રામની…

સુખ  ભોગવવા  કરે  કમાણી,  લક્ષ્મી  ઢસડી  લાવે;
ભોગવવાનું  ટાણું  આવે  ત્યાં,  ગેબનાં  તેડાં  આવે……  રામની…

ભૂવો  ધૂણીને  માંદો  પડે  ત્યારે,  બીજા  ભૂવાને  બોલાવે;
તાપ  તપે  જ્યારે  વૈદ્યના  તનમાં,  ઓસડ  યાદ  ન  આવે……  રામની…

જોષીડો  સહુના  જોષ  જુવે  ને,  ધનના  યોગ  બતાવે;
બીજાને  લખપતિ  બનાવે,  એને  દોકડો  હાથ  માં  ન  આવે……  રામની…

ઘેલી  લાલચમાં  ઘેલા  બનીને,  ગાંઠનો  ગરથ  ગુમાવે;
દેવી  દેવતા  પીર  પેગંબર,  આવરદા  ન  અપાવે……  રામની…

રામ   કહે   તે   કામ   કરી   લે,   હુકમ   હરદે   આવે;
‘કાગ’  કે  જીવડા  વમળે  ચડ્યો  તો,  લખચોરાશીમાં  જાવે……  રામની…