સ્મરણ - સૌપ્રિય સોલંકી “શૈલ”
ભર મધરાતે તમારું સ્મરણ કર્યાનું યાદ,
ચપટીભર કંકુ સેંથીએથી ખર્યાનું યાદ.
પ્રસંગો બધા નજરું સામે હાથ તાળી રમે,
ને સામટા અરમાનોના જૌહરની યાદ.
મૌનની સજા ગૂંગળાવે મુજ ચિત્તને,
ને સવારે ઝાકળ થઇ ઠરી ગયાનું યાદ.
ભીંત પરના થાપા ચીતર્યાને વિસ્તર્યા,
તિમિરના નીરમાં હશે ડૂબ્યાનું યાદ.
મીણની જેમ પીગળતું આ પ્રતિબિંબ,
કાળના કાળા ઓછાયાથી ડર્યાનું યાદ.
ઝંખનાના દરિયામાં નીતરતો ‘હું’ ને
મૃગજળમાં મઝધારે નાવ તર્યાનું યાદ.
હસ્તરેખાઓની મર્યાદા પૂરી થતાં જ,
અશ્રુઓ શબનમ બનીને ઠર્યાનું યાદ.
9 comments June 21, 2007
