નામ :: અંકિત ત્રિવેદી

મારી   હથેળીના  દરિયામાં   મે   તો  તરતું  મુકેલ  તારું  નામ
શ્વાસોમાં ભરવાનો ગુલમ્હોરી રંગ હવે વેદનામાં ભળતો આરામ

            હથેળી ના દરિયાને દર્પણ માનીને
                        તારા ચહેરાને શોધવા હું નીકળ્યો,
            આંગળીથી ચીતરેલા અક્ષરને લાગ્યું કે
                        રોમરોમ તારામાં પીગળ્યો

દરિયો હથેળીનો ઘૂઘવે એવો કે જાણે લહેરોનો રેતમાં મુકામ
મારી   હથેળીના  દરિયામાં  મે  તો  તરતું  મુકેલ  તારું  નામ

            મનગમતાં નામને ઉમર ના હોય
                        એ તો ગમે ત્યારે હાથ પર લખાય,
            મોસમને જોઇને ફૂલના ખીલે
                        એના ખીલવાની મોસમ બદલાય

અંદરથી બદલાતી મોસમનાં સમ તારા હાથમાં છે મારી લગામ
મારી    હથેળીના    દરિયામાં   મે   તો  તરતું  મુકેલ  તારું  નામ.