એક શરણાઇવાળો – દલપતરામ.

એક  શરણાઇવાળો  સાત  વર્ષ  સુધી  શીખી,

રાગ  રાગણી  વગાડવામાં  વખણાણો  છે;

એકને  જ  જાચું  એવી  ટેક  છેક  રાખી,  એક

શેઠને  રીઝાવી  મોજ  લેવાને  મંડાણો  છે;

કહે  દલપત્ત  પછી  બોલ્યો  તે  કંજુસ  શેઠ,

ગાયક  ન  લાયક  તું  ફોકટ  ફુલાણો  છે;

પોલું  છે  તે  બોલ્યું  તેમાં  કરી  તેં  શી  કારીગરી,

સાંબેલું  બજાવે  તો હું  જાણું  કે  તું  શાણો  છે.

તું – પન્ના નાયક.

કોઇનોય પગ ન પડ્યો હોય
એવા
લીલાછમ ઘાસમાં
અચાનક
કોઇ
હરણી
એનું કાનન છોડી
થનગનતી આવે
ને
સૂર્યકિરણો સાથે ગેલ કરતી
ઠેકડા મારી
આળોટે
એમ
મારા મનમાં
તારી સ્મૃતિ.