Archive for સપ્ટેમ્બર, 2006

હે રંગલો – અવિનાશ વ્યાસ

હે  રંગલો,
જામ્યો  કાલંદરી  ને  ઘાટ,
છોગાળા  તારા,
હો  રે  છબીલા  તારા,
હો  રે  રંગીલા  તારા  રંગભેરૂ  જુએ  તારી  વાટ,  રંગલો.

હે  હાલ્ય  હાલ્ય  હાલ્ય,
વહી  જાય  રાત  વાત  માં  ને,  માથે  પડશે  પ્રભાત,
છોગાળા  તારા,
હો  રે  છબીલા  તારા,
હો  રે  રંગીલા  તારા  રંગભેરૂ  જુએ  તારી  વાટ,  રંગલો.

હે  રંગરસીયા,
હે  રંગરસીયા  તારો  રાહડો  માંડી  ને,  ગામને  છેવાડે  બેઠા,
કાના  તારી  ગોપલીએ,  તારે  હાટુ  તો  કામ  બધા  મેલ્યાં  હેઠાં.
હે  તને  બરકે  તારી  જશોદા  તારી  માત…
છોગાળા  તારા,
હો  રે  છબીલા  તારા,
હો  રે  રંગીલા  તારા  રંગભેરૂ  જુએ  તારી  વાટ,  રંગલો.

મારા  પાલવ  નો  છેડલો  મેલ,  છોગાળાઓ  છેલ
કે  મન  મારું  મલકે  છે.
એ  હું  મોરલો  ને  તું  તો  મારી  ઢેલ,
હું  છોડવો  તું  વેલ
કે  મન  મારું  ઘડકે  છે.

હે  હે  હે…..હે જી

સાંજ  ને  સુમારે
જ્યારે  સુર  જ્યાં  નમે
નર  નાર  લગે  તાર
સંગ  રંગ  રમે
કોઇ  રૂપની  કટોરી,  કોઇ  રૂપનો  કટોરો
કોઇ  શ્યામ,  કોઇ  ગોરો
રમે  છોરી  અને  છોરો
ધરણી  ધમધમે…..

હે  જી  રે…..
તુર  તુર  તુર

ગાંડીતુર  શરણાઇ  કેરા  સુર
વીંધે  ઉર  ચકચુર
સંગે  તાલ  ને  નુપુર
તારુ  પાદર  ને  પુર
સામ  સામ  સામે
હે  જીણું  જીણું  વાગતી  રે વેણું
રે  ને  ગામને  પાદર  ઉડતી  રે  રેણું
ને  નાચતી  રે  આવે  કોઇ  ગામની  રે  ઘેનું
છેલ  રે  છબીલી  નાર  છમ્  છમ્  છમે.
છેલ  રે  છબીલી  નાર  છમ્  છમ્  છમે.

સપ્ટેમ્બર 24, 2006 at 10:59 પી એમ(pm) 11 comments

પાંદડું ઉડી ઉડી જાય રે


પાંદડું  ઉડી  ઉડી  જાય  રે
પરદેશી  લાલ  પાંદડું
હે  પાંદડાની  માયા  મુને  લાગી  પરદેશી  લાલ  પાંદડુ.

હે  માડી  મારો  સસરો  આણે  આવ્યો
હે  માડી  હું  તો  સસરા  ભેરી  નહીં  જાઉં,
સાસુજી  મ્હેંણા  બોલે….. પરદેશી  લાલ  પાંદડું  – પાંદડું.

હે  માડી  મારો  જેઠજી  આણે  આવ્યો
હે  માડી  હું  તો  જેઠજી  ભેરી  નહીં  જાઉં, 
જેઠાણી  મ્હેણાં  બોલે….. પરદેશી  લાલ  પાંદડું  – પાંદડું.

હે  માડી  મારો  દેરજી  આણે  આવ્યો
હે  માડી  હું  તો  દેરજી  ભેરી  નહીં  જાઉં,
દેરાણી  મ્હેણાં  બોલે….. પરદેશી  લાલ  પાંદડું  – પાંદડું.

હે  માડી  મારો  પરણ્યો  આણે  આવ્યો
હે  માડી  હું  તો  પરણ્યા  ભેરી  જટ  જાઉ,
પરણ્યોજી  મીઠું  બોલે….. પરદેશી  લાલ.

પાંદડુ  ઉડી  ઉડી  જાય  રે
પરદેશી  લાલ  પાંદડું
હે  પાંદડાની  માયા  મુને  લાગી  પરદેશી  લાલ  પાંદડુ.

સપ્ટેમ્બર 24, 2006 at 2:17 પી એમ(pm) 2 comments

માડી તારુ કંકુ ખર્યું ને સુરજ ઊગ્યો – અવિનાશ વ્યાસ

માડી  તારુ  કંકુ  ખર્યું  ને  સુરજ  ઊગ્યો
જગ  માથે  જાણે  પ્રભુતાએ  પગ  મૂક્યો.

મંદિર  સર્જાયુ  ને  ઘંટારવ  ગાજ્યો
નભનો  ચંદરવો  મા  એ  આંખ્યુમાં  આંજ્યો
દીવો  થાવા  મંદિરનો  ચાંદો  આવી  પૂગ્યો
કંકુ  ખર્યું  ને  સુરજ  ઉગ્યો… માડી  તારુ  કંકુ  ખર્યું  ને  સુરજ  ઊગ્યો.

માવડી  ની  કોટમા  તારાના  મોતી
જનની  ની  આંખ્યું  માં  પૂનમની  જ્યોતિ
છડી  રે  પુકારી  મા  ની  મોરલો  ટ્હુક્યો
કંકુ  ખર્યું  ને  સુરજ  ઉગ્યો… માડી  તારુ  કંકુ  ખર્યું  ને  સુરજ  ઊગ્યો.

નોરતાં  ના રથનાં  ઘૂઘરા  રે  બોલ્યા
અજવાળી  રાતે  મા  એ
અમરત  ઢોળ્યાં
ગગન  નો  ગરબો  મા  ના  ચરણોમાં  ઝૂક્યો
કંકુ  ખર્યું  ને  સુરજ  ઉગ્યો… માડી  તારુ  કંકુ  ખર્યું  ને  સુરજ  ઊગ્યો.

સપ્ટેમ્બર 23, 2006 at 11:14 પી એમ(pm) 5 comments

મા નો ગરબો રે, રમે રાજ ને દરબાર.

મા  નો  ગરબો  રે,  રમે  રાજ  ને  દરબાર.

મા  નો  ગરબો  રે ,  રમે  રાજ  ને  દરબાર,
રમતો  ભમતો  રે  આવ્યો  કુંભારી  ને  દ્વાર.

એલી  કુંભારી  ની  નાર  તું  તો  સુતી  હોય  તો  જાગ,
મા  ને  ગરબે  રે  રૂડા  કોડિયાં  મેલાવ.

મા  નો  ગરબો  રે ,  રમે  રાજ  ને  દરબાર,
રમતો  ભમતો  રે  આવ્યો  સોનીડા  ને  દ્વાર.

એલી  સોનીડા  ની  નાર  તું  તો  સુતી  હોય  તો  જાગ,
મા  ને  ગરબે  રે  રૂડા  જાળીયા  મેલાવ.

મા  નો  ગરબો  રે ,  રમે  રાજ  ને  દરબાર,
રમતો  ભમતો  રે  આવ્યો  ઘાંચીડા  ને  દ્વાર.

એલી  ઘાંચીડા  ની  નાર  તું  તો  સુતી  હોય  તો  જાગ,
મા  ને  ગરબે  રે  રૂડા  દિવેલીયા  પુરાવ.

મા  નો  ગરબો  રે,  રમે  રાજ  ને  દરબાર.

સપ્ટેમ્બર 23, 2006 at 9:30 એ એમ (am) 6 comments

ઝૂલણ મોરલી વાગી રે, રાજાના કુંવર !

ઝૂલણ  મોરલી  વાગી  રે,  રાજાના  કુંવર  !
હાલો  ને  જોવા  જાયેં  રે
      મોરલી  વાગી  રે,  રાજાના  કુંવર.

ચડવા  તે  ઘોડો  હંસલો  રે,  રાજાના  કુંવર,
      પીતળિયા  પલાણ  રે.  –  મોરલી…..

બાંયે  બાજુબંધ  બેરખા  રે,  રાજાના  કુંવર,
      દસેય  આંગળીએ  વેઢ  રે.  –  મોરલી…..

માથે  મેવાડાં  મોળિયાં  રે,  રાજાના  કુંવર,
      કિનખાબી  સુરવાળ  રે.  –  મોરલી…..

પગે  રાઠોડી  મોજડી  રે,  રાજાના  કુંવર,
      ચાલે  ચટકતી  ચાલ્ય  રે.  –  મોરલી….

ઝૂલણ  મોરલી  વાગી  રે,  રાજાના  કુંવર  !
હાલો  ને  જોવા  જાયેં  રે
      મોરલી  વાગી  રે,  રાજાના  કુંવર.

ઝૂલણ મોરલી સાંભળો : ટહુકો.

સપ્ટેમ્બર 22, 2006 at 12:36 એ એમ (am) 5 comments

ઘણ ઉઠાવ – સુન્દરમ્

સુન્દરમ્ – ત્રિભુવનદાસ લુહાર ( 22-03-1908  ::  13-01-1991 )

ઘણુંક  ઘણું  ભાંગવું,  ઘણ  ઉઠાવ,  મારી  ભુજા  !
ઘણુંક  ઘણું  તોડવું,  તું  ફટકાર  ઘા,  ઓ  ભુજા  !
અનંત  થર  માનવી  હ્રદય  –  ચિત્ત  –  કાર્યે  ચઢ્યા
જડત્વ  યુગ  જીર્ણના,  તું  ધધડાવી  દે  ઘાવ  ત્યાં.

ધરા  ધણધણે  ભલે,  થરથરે  દિશા,  વ્યોમમાં
પ્રકંપ  પથરાય  છો,  ઉર  ઉરે  ઊઠે  ભીતિનો
ભયાનક  ઉછાળ  છો,  જગત  જાવ  ડૂલી  ભલે,
પછાડ  ઘણ,  ઓ  ભુજા  !  ધમધમાવ  સૃષ્ટિ  બધી  !

અહો  યુગયુગાદિનાં  પડ  પરે  પડો  જે  ચઢ્યાં
લગાવ,  ઘણ  !  ઘા,  ત્રુટો  તડતડાટ  પાતાળ  સૌ,
ધરાઉર  દટાઇ  મૂર્છિત  પ્રચંડ  જ્વાલાવલી
બહિર્ગત  બની  રહો  વિલસી  રૌદ્ર  કૃત્કારથી.

         તોડીફોડી  પુરાણું,
         તાવી  તાવી  તૂટેલું.

ટીપી  ટીપી  બધું  તે  અવલનવલ  ત્યાં  અર્પવા  ઘાટ  એને
ઝીંકી  રહે  ઘા,  ભુજા  ઓ,  લઇ  ઘણ,  જગને  ઘા  થકી  ઘાટ  દેને. 

સપ્ટેમ્બર 20, 2006 at 10:48 પી એમ(pm) 6 comments

મારું હૈયું ખોવાયું એક વેળા – ગુલાબદાસ બ્રોકર.

ગુલાબદાસ હ. બ્રોકર ( 20-09-1909 :: 10-06-2006 )

મારું  હૈયું  ખોવાયું  એક  વેળા,
રે  રાજ,  મારું  હૈયું  ખોવાયું  એક  વેળા.

જ્યારે  સૂરજદેવ  થાકી  આકાશથી  પચ્છમમાં  ઊતરી  ગયેલા,
ધરતી  રાણીનું  હૈયું  જ્યારે  ઉલ્લાસથી  શ્વાસ  લેતું  આશથી  ભરેલા,
એવી  એક  સાંજ  રે  ઘેલું  બનેલ  આ  હૈયું  ખોવાયું  એક  વેળા.
                              રે  રાજ,  મારું  હૈયું  ખોવાયું  એક  વેળા.

ત્યારથી  તે  આજ  સુધી  ચૌટે  ને  ચોકમાં  શોધું  હું  બ્હાવરી  શી  એને,
સાગરને  તીર  કે  નદીઓનાં  નીરમાં  તારલાને  લાખલાખ  નેને,
ક્યાંયે  ના  ભાળતી  સહેજે  ગયેલ  જે  હૈયું  ખોવાઇ એક  વેળા,
                              રે  રાજ,  મારું  હૈયું  ખોવાયું  એક  વેળા.

ખોળી  ખોળીને  એની  આશ  છોડી  આજ  હું  આવતી’તી  સીમમાંથી  જ્યારે,
ત્યારે  દીઠો  મેં  ક્હાન  પાવો  વગાડતો  ઝૂલીને  વડલાની  ડાળે,
બોલ્યું  શું  પાવાના  મધમીઠા  સૂરમાં,  જે  હૈયું  ખોવાયું  એક  વેળા.
                              રે  રાજ,  મારું  હૈયું  ખોવાયું  એક  વેળા.

સપ્ટેમ્બર 20, 2006 at 12:52 એ એમ (am) 5 comments

Older Posts Newer Posts


મને ગમતાં કાવ્યોનું અમી ઝરણું

મિત્રગણ

  • 258,339 અમીનજરું

દિવસવાર ટપાલ

સપ્ટેમ્બર 2006
સોમ મંગળ બુધ ગુરુ F શનિ રવિ
 123
45678910
11121314151617
18192021222324
252627282930