Archive for ડિસેમ્બર 2, 2006

હાલો ગલૂડાં રમાડવા જી રે ! – ઝવેરચંદ મેઘાણી.

કાળુડી કૂતરીને આવ્યાં ગલૂડિયાં
         ચાર કાબરાં ને ચાર ભૂરિયાં રે
                  હાલો ગલૂડાં રમાડવા જી રે !

માડીને પેટ પડી ચસ ! ચસ ! ધાવે
         વેલે ચોંટ્યાં જેમ તૂરિયાં રે
                  હાલો ગલૂડાં રમાડવા જી રે !

માતાને માથડે ચડતાં ને ચાટતાં,
         જોગણનાં જાણે લટૂરિયાં રે
                  હાલો ગલૂડાં રમાડવા જી રે !

રાતાં માતાં ને રોમે રોમે સુંવાળા,
         હોય મીઠાં ગાલ-મસૂરિયાં રે
                  હાલો ગલૂડાં રમાડવા જી રે !

બાને વા’લાં છે જેમ વીરો ને બેની,
         કાળવીને વા’લાં કુરકુરિયાં જી રે
                  હાલો ગલૂડાં રમાડવા જી રે !

મોટાં થાશે ને મારી શેરી સાચવશે,
         જાગશે રાતે બ્હાદુરિયાં રે
                  હાલો ગલૂડાં રમાડવા જી રે !

ટીપુડો દીપુડો ડુંગરડે ઘૂમશે,
         ગોધેન ભેળા વોળાવિયા રે
                  હાલો ગલૂડાં રમાડવા જી રે !

મોતિયો ને માનિયો ઝોકે રોકાશે,
         વાછરુ ને પાડરુ ભળાવિયાં રે
                  હાલો ગલૂડાં રમાડવા જી રે !

ડાઘિયો દૂધિયો ખેતરમાં જાશે
         વાસુ રે’શે બે રખોલિયા રે
                  હાલો ગલૂડાં રમાડવા જી રે !

કાળિયો ને લાલિયો પાદર પસાયતા
         બાઉ ! બાઉ ! આલબેલ બોલિયા રે
                  હાલો ગલૂડાં રમાડવા જી રે !

ગોળ-ઘી-લોટના શીરા બનાવ્યા
         કાળવીનાં પેટડાં પૂરિયાં રે
                 હાલો ગલૂડાં રમાડવા જી રે !

પેટ ભરીને માડી બાળક ધવરાવે
         ધાવીને પોઢે ટીપૂડિયાં રે
                  હાલો ગલૂડાં રમાડવા જી રે !

ડિસેમ્બર 2, 2006 at 9:56 પી એમ(pm) 3 comments

નિયમ સાવ નોખા – મનોજ ખંડેરિયા.

રસમ અહીંની જુદી, નિયમ સાવ નોખા
અમારે તો શબ્દો જ કંકુ ને ચોખા

હવાયેલી સળીઓ જ ભીતર ભરી છે
અહીંનાં જીવન જાણે બાકસનાં ખોખાં

લચ્યાં’તાં જે આંખે લીલા મોલ થઇને
હવે એ જ સપનાં છે સુક્કાં મલોખાં

તું તરસ્યાને આપે છે ચીતરેલાં સરવર
તને ટેવ છે તો કરે કોણ ધોખા

વહાવ્યા કરું આંગળીમાંથી ગંગા
કે ક્યારેક જો થઇ જાય ચોખ્ખા.

ડિસેમ્બર 2, 2006 at 9:36 એ એમ (am) 2 comments


મને ગમતાં કાવ્યોનું અમી ઝરણું

મિત્રગણ

  • 259,983 અમીનજરું

દિવસવાર ટપાલ

ડિસેમ્બર 2006
સોમ મંગળ બુધ ગુરુ F શનિ રવિ
 123
45678910
11121314151617
18192021222324
25262728293031