ભ્રમણા – ડૉ. નીલેશ રાણા

વૃક્ષોની ડાળી કે ઘરની ફૂલદાની
                        ફૂલોનું કરમાવું એક.
નજરું ભલે હોય તારે કે મારી
                        આંખોનું ભરમાવું એક.

ધુમ્મસિયા સૂરજના થીજેલા અજવાળે
                        ઝરણાં વહે બની ભ્રમણા,
હાથમાં હાથ ભલે ઓગળતા હોય
                        તોય નંદવાયાં રૂપાળાં સમણાં.
પાંપણમાં આંસુ રોક્યાં રોકાય નહીં
                         ટપકે છે એક પછી એક.

હથેળીમાં અંકાતી વંકાતી રેખાઓ
                        મારે હાંસિયામાં જીવવાનું કેમ ?
ઇશ્વરની આંગળીઓ પીંછીએ થાય
                        તોય રંગો ના કેમ હેમખેમ ?
વલોવ્યા છો ભીતરમાં ઓળખના મેરુ
                         થાય ના પાણી-પ્રતિબિંબ કદી એક.