કોને ખબર – રમેશ પારેખ. Ramesh Parekh.
જાન્યુઆરી 5, 2007 at 10:17 પી એમ(pm) 2 comments
પાંદડું કેવી રીતે પીળું થયું, કોને ખબર ?
એટલે કે ઝાડમાંથી શું ગયું, કોને ખબર ?
શહેર પર ખાંગી થઇ વરસી પડી આખી વસંત
એક જણ નખશિખ ઉજ્જડ રહી ગયું, કોને ખબર ?
શાહીમાંથી આમ કાં ઢોળાય છે તારાં સ્મરણ ?
અને મારું એક મન ઓછું પડ્યું ? કોને ખબર ?
સ્વપ્નમાં વહેતી’તી નહેરો તારા ચહેરાની સતત
ને સવારે આંખમાંથી શું વહ્યું, કોને ખબર ?
માછલીએ એકદા જળને પૂછ્યું : તું કોણ છે ?
એનો ઉત્તર શોધવા જળ ક્યાં ગયું, કોને ખબર ?
મેં અરીસાને અમસ્થો ઉપલક જોયો, રમેશ
કોણ એમાંથી મને જોતું રહ્યું, કોને ખબર ?
Entry filed under: કવિતા.
અમીઝરણું... 
1.
સુરેશ જાની | જાન્યુઆરી 7, 2007 પર 9:12 એ એમ (am)
મેં અરીસાને અમસ્થો ઉપલક જોયો, રમેશ
કોણ એમાંથી મને જોતું રહ્યું, કોને ખબર ?
વાહ ! શું સુંદર આત્મનિરીક્ષણ !
2.
shivshiva | જાન્યુઆરી 8, 2007 પર 10:55 પી એમ(pm)
ખૂબ સુંદર કાવ્ય છે