યાચના – ઝવેરચંદ મેઘાણી.

રાષ્ટ્રીય શાયર શ્રી ઝવેરચંદ મેઘાણી ( 17-08-1896 :: 09-03-1947 )

મોરલા  હો !  મુંને  થોડી  ઘડી
                 તારો  આપ  અષાઢીલો  કંઠ :
    ખોવાયેલી  વાદળીને  હું
    છેલ્લી  વાર  સાદ  પાડી  લઉં.

ઇંન્દ્રધનુષ !  તારા  રંગ-ધોધોમાંથી
                 એક  માગું  લીલું  બુન્દ :
    સાંભરતાંને  આંકવા  કાજે
    પીંછી  મારી  બોળવા  દેજે !

મેઘમાલા !  તારા  લાખ  તારોમાંથી
                 ખેંચવા  દે  એક  તાર :
    બેસાડીને  સૂર  બાકીના
    પાછી  સોંપી  દૈશ  હું  વીણા.

ઘોર  સિંધુ !  તારા  વીંજણાનું  નાનું
                 આપજે  એક  કલ્લોક :
    હૈયું  એક  નીંદવિહોણું –
    ભાલે  એને  વાયરો  ઢોળું.

રાતરાણી !  તારા  ઝાકઝમાળાનું
                 મારે  નથી  કાંઇ  કામ :
    ગાઢ  અંધકાર – પછેડા
    ઓઢાડી  દે  ઊંઘની  વેળા.